من اكثر المواضيع اللي احب اتابعها عند البلوقر ماي ڤيڤورت لكل شهر ، تعلمني بمنتجات جديدة ورأي البلوقر بكل منتج ، عشان كذا حبيت ابدا بهالموضوع ، مفضلاتي للفترة اللي فاتت ..
هالمنتج حلم كنت احلم فيه وماصدقت نزلوه بالموقع من زمان كان نفسي اجرب اضاءات ذا بالم بس الصدق كنت متحسفة اشتري العلبة وش كبرها وانا مااستخدم الاضاءات كثير ، لكن هالعلبة حجمها مناسب وتحتوي ثلاث درجات البرونز والبينك واللؤلؤي ، حبيتها وكانت فكرة موفقه من الشركة انهم دمجوها وبحجم صغير
اشتريتها من تاجرة ب ١٧٠ ريال
ثاني منتجين بروكونسيلر واي شادو من كولوربوب ، الكونسيلر اكثر شي حببني فيه سعره جداً رخيص "طبعا مااتكلم عن سعر التاجرات عندنا" ثباته ممتاز التغطية بالنسبة لي ممتازة لاني الحمدلله ماعاني من هالات قوية
والاي شادو لونه جداً جمييييييل انصحكم فيه اسمه i heart
الاسعار تختلف من تاجرة لتاجرة لانهم للاسف مو متوفرين
الصابون الاسود الافريقي ، كنت اشوف تقييمه عالي وكل الاجانب تكلمو عنه فقررت اجربه وجداً ممتاز يعقم وينظف وبنفس الوقت مايجفف البشرة وهذا اكثر شي عجبني فيه ، انصح فيه للبشرات الجافة واللي تعاني من الاكزيما
سكرب ملح البحر الميت من بودي شوب
اتوقع مابقى احد ماتكلم عنه ، للامانه مااحب السكرب اللي تقشيره خفيف بس اكثر شي عجبني فيه الترطيب اللي بعد السكرب ، جمييييييييييييل للي يحب الترطيب الزيتي تطلعين من الشور وكانك رطبتي جسمك
سعره ٩٩ ريال تقريباً والعلبة حجمها كبير
حمام زيت معالج بالكيراتين ، من اكثر حمامات الزيت اللي حبيتها واستخدمها
يخفف النفشة بالشعر ويسهل تمشيطه
بس نصيحة لاتحطينه على فروة الراس اتوقع انه قوي عالشعر وممكن يسبب تساقط او قشرة
انا استخدمه من نص شعري للاطراف
متوفر بالصيدليات
هالغسول اقدر اقول انقذ لي بشرتي ، استخدمت قبله غسول دمرلي بشرتي وكانت بمعدل يومياً تطلع حبه ومن استخدمت هذا بدت تخف الحبوب ينظف ويرطب بنفس الوقت ممتاز للبشرات الدهنية والحساسة
متوفر بالصيدليات بسعر ٩٩
هاند كريم من صيدلية بوتس باللافندر
مره كنت واقفة عند الحساب بصيدلية بوتس واشوف اللي قدامي ام وبنتها ماخذين من هالكريم عشرة علب تقريبا وطبعا بدت اللقافه فيني فقررت اجربه ، حبيته يرطب ومايدبق اهم ششششي ! اكره كريم اليد اللي يتلصق
ريحته خفيفة وفيه منه انواع بس انا جربت هذا
مرطب شفايف اشوفه دايم باي هيرب بست سيلر وتقييمه عالي ، ولقيته بصيدلية نورا واشتريته بدون تفكير
باختصار لم تحطينه تحسين شفايفك تتنفس
جدا جميل وترطيبه عالي ويستاهل التقييم
سعره ٢٥ تقريبا
اخر شي عطري اللي هابه فيه لي فترة ، لانكوم عود ماراح اوصف بس اذا رحتو لمحل عطور جربو تشمونه
انا وقعت بغرامه من اول مره ريحته ورد على عود مااعرف كيف اوصفه بس جمييييل
وسعره ٧٥٠ ريال
واخيراً انتهى البوست البسيط ، اللي جرب اي منتج من هالمنتجات يكتب رايه
ويعطيكم الف عافية
